Exposición de Antropoloxía - 1º de bacharelato.



EXPOSICIÓN DE ANTROPOLOXÍA SOBRE A EVOLUCIÓN HUMANA

 O alumnado da materia optativa de Antropoloxía de 1º Bacharelato ven de realizar unha exposición sobre a evolución humana dividida en dúas partes. Unha parte amosa o percorrido polas especies máis destacables dos últimos 5 millóns de anos, idade aproximada na que a liñaxe dos homínidos se separa da dos monos antropomorfos máis cercanos, os chimpancés e orangutáns. A outra parte presenta uns paneis informativos sobre as razóns dos cambios evolutivos dos antepasados humanos en África, sobre as teorías en pugna acerca do ritmo de expansión desas especies fóra de África, e por último un panel onde se contrapón a nosa especie, o homo sapiens sapiens, co home de neandertal, un humano extinguido hai 35.000 anos e acerca do cal hai senlleiras películas e novelas moi atractivas para os adolescentes. Resulta de interés comprobar que os avances tecnolóxicos e políticos da civilicación son moi recentes tomados nunha perspectiva diacrónica, e que humanos coma nós hai 100.000 anos vivían dun modo moi similar aos erectus de hai un millón. 





Está no corredor do edificio 1, vinde a vela merece a pena.

"Os nomes de noso"



Exposición da actividade que leva por nome "Os nomes de noso" realizada cos traballos para indagar a orixe dos nomes e apelidos do alumnado de 1º de bacharelato A e C. 








"Cedeira" de Guadi Galego



Tema incluído no novo disco de GUADI GALEGO “O MUNDO ESTÁ PARADO” 

 “CEDEIRA”


Os egos da revolución visten roupa cinguida,
escalas en modo maior copan todos os shows.
Describen un mundo invisible partido por catro,
prometen que os demos e os anxos son da mesma cor.
Aquí o reduto é diverso, non hai etiquetas;
se cadra, diría Pedreira, o da xubilación,
poder deitarse e deixar que a vida te agache,
e nós en silencio escoitando este noso son.
Imos tan xuntiñas pola beira da canción,
prenden candeas, rompen as ondas.
Imos devagar paseando en plural,
calma e serena que medre a area e o mar.
O norte equipara a beleza coa melancolía
o norte é poema en si mesmo, é perfume e canción.
Que poidas cantar ou lembrar esta suave habaneira,
na praia de Rinlo, en Cuba, ou mesmo en Cedeira.
Deixarse levar pola luz que desmonta as ideas,
tratar polo miúdo as cadeas, pensar que ser libre e ser máis.
Vivir asubiando amodiño a nosa habaneira,
deixarse levar pola luz que desmonta as ideas,
que poidas cantar ou lembrar esta suave habaneira....

Actuacións de despedida do primeiro trimestre






O derradeiro día de clase antes das vacacións do Nadal xa comezamos a relaxarnos e desfrutar cos concertos que o profesor de música Juan Ventoso estivo a preparar co seu alumnado dos distintos niveis.





















O espectáculo de maxia non só nos sorprendeu senón que tamén nos fixo rir.














Tamén se lle fixo entrega dun agasallo ao alumno de 2º curso de electromecánica de vehículos Martín García García quen acadou a medalla de prata na especialidade de Tecnoloxía do automóbil no 4º campionato Galego de Formación Profesional Galiciaskills que tivo lugar a principios do pasado mes de novembro.






CONCURSO DE ADHESIVOS 2017

Resultado de imagen de imaxes diccionario dos seres míticos gallegos
A Coordinadora de Equipos de Dinamización Lingüística do Salnés organiza como cada ano o CONCURSO DE ADHESIVOS. Nesta ocasión o tema son os SERES MÍTICOS CON PODERES SUPERLINGÜÍSTICOS.


Para achegarnos a esta temática nada mellor que o Dicionario dos seres míticos galegos e a páxina de Galicia Encantada. (Enciclopedia da Fantasía Popular de Galicia.

Concerto homenaxe a Bob Dylan no IES de Vilalonga

O Departamento de Música do IES de Vilalonga sumouse ás homenaxes a Bob Dylan facendo un concerto no patio do instituto co alumnado de 3º e 4º ESO e 1º de bacharelato. O tema interpretado foi Blowing in the Wind.

O TEI TRAE UNHA CONTACONTOS



 O 5 de decembro a 4ª e 5ª hora da mañá, tivo lugar a actuación da contacontos Ángeles Goas. A 3ª hora asistiron os alumnos de 1º A e 3º B, e a 5ª hora os de 1ºB, 1º C e 3º A.
Esta actividade enmarcouse dentro das actividades de cohesión do programa TEI. Tentamos que o alumnado participante neste programa fixeran actividades en común, se relacionaran e se divertiran xuntos.
A sesión de contacontos levou o título de “ O medo é libre” e consistíu nunha serie de historias, con base real, na que Ángeles contou en ton de humor, situacións nas que o medo domina a vida da xente e de como o sentimento do amor sempre se sobrepón ao do medo e da angustia.
A actividade resultou satisfactoria para os alumnos. Ángeles Goas é Profesora de Educación Infantil. A raíz da súa profesión e vocación, leva máis de 20 anos contando contos para nenos. Nos últimos 3 anos comezou a súa andaina como contadora de contos para maiores. Ten un estilo moi claro, unha expresión moi diáfana, na que combina o humor, a tenrura e o sentido común. Deste xeito, vai levando ao público a través das personaxes e do fío das historias, enmarcadas case sempre no rural galego, cara unha conclusión sempre positiva e alentadora.  



CHARLA de MANUEL PORTAS sobre "Lourenço, xograr"

O pasado xoves contamos coa presenza de Manuel Portas no noso centro. Esta vez, tocaba falar da súa última obra, Lourenço, xograr, unha ambiciosa novela histórica ambientada no medievo coa que soña todo profesor de literatura galega para trasladar ó alumnado á época do xograr Lourenço. E alí atopármonos co trobador Joam García de Guilhade, María Peres, a Balteira e Afonso X, entre outros, convertidos en voces narrativas dunha historia que ficciona parte da noso pasado medieval e nos achega ós tempos da Idade Media galega na que a lírica trobadoresca conquistaba toda a península.







Se queres ver máis fotos desta actividade, pincha nesta ligazón

Recensións teatrais de "GET BACK"

Recensión de ANA CORES, 1º BACHARELATO A


 O pasado xoves 17 de novembro o alumnado de 1º de bacharelato do IES de Vilalonga asistiu á representación da obra de teatro "Get Back" (como a canción dos Beatles) do grupo Eme2 no teatro Principal, en Pontevedra, grazas a unha actividade organizada polo EDLG (Equipo de dinamización da lingua galega). Esta obra foi escrita por Diego Ameixeiras e dirixida por Jorge Coira, baseada nunha idea orixinal de Camilo Franco.

A trama desenvólvese entre o drama, a ironía e o humor ofrecendo unha visión sobre os conflitos galegos, neste caso dos "londonders", galegos que viven na cidade de Londres, que emigraron en busca dunha vida mellor. É unha peza cargada de retranca que conta a historia de cinco persoas que van nun vagón do metro de Londres.“Get Back” representa a cinco persoas, catro delas galegas e outra inglesa, que se atopan no transporte da capital británica. Estas cinco persoas teñen moitas cousas en común, pero eles non o saben. Saben de onde veñen, pero ningún está seguro de a onde vai.

Todo comeza como un accidente, o metro detén o seu movemento e comezan os problemas. Están atrapados no medio dun túnel; pode ser unha avaría, un atentado, unha folga, ou todas as cousas á vez. A partir deste momento, as súas vidas quedan cruzadas. Cada un ten a súa historia, cada un cos seus apuros, a súa crise pequena ou grande. E no momento que o metro se deteña, terán un momento para parar, poñela en conflito cos demais e aprender algo da vida.

O elenco desta obra está composto por Alfonso Agra, Federico Pérez, Mercedes Castro, Miguel Guido e Tamara Canosa que dan vida a unha variedade de personaxes entre os que hai unha bióloga buscando a vida cun traballo de camareira, un empresario que leva tempo afincado en Londres, un informático buscando a súa oportunidade, unha muller adicta ao alcohol que se lamenta polo seu pasado e un londiniense. A representación destes personaxes é magnífica, os actores desenvolven os seus papeis moi ben. Os cinco intérpretes encarnan os seus respectivos personaxes con moita veracidade, de tal forma que nos fan esquecer que somos membros dun público e que estamos nun teatro. A min gustoume, especialmente, a interpretación de Mercedes Castro, non calquera vale para darlle vida a unha muller borracha, e ademais cunha historia tan dura e triste coma a dela.


 “Get Back” é unha obra moi realista. Quizais este feito, faga que sexa moi difícil que a representación non nos guste, pois calquera persoa se pode ver nunha situación similar ou igual. É ben sabido que o teatro non se caracteriza, a diferenza do cine, por un gran decorado ou unha gran iluminación, debido ás súas limitacións. Non obstante, a decoración, o vestiario, a maquillaxe, o escenario, os audiovisuais, a música e a iluminación desta obra estaban de acordo co representado e non se precisaba de nada máis. Quizais, o único que puido fallar fose o son, xa que houbo algún que outro momento nos que non se entendía aos actores.

Recoméndolle a todo o mundo que se anime e vaia a ver esta obra, a min encantoume. É ese tipo de representación teatral na que ris, a pesar de que o que se está interpretado é duro e moi real. Con esta obra aprendín que non todo é un camiño de rosas e que ás veces o mundo vese en branco e negro, pero aínda así debemos loitar polos nosos soños, e xamais renderse por moi duro que sexa ese camiño.

RECENSIÓN DE ANA FERNÁNDEZ, 1º BACHARELATO A.




















No escenario atópase ilustrado un vagón de metro en marcha. Nel hai carteis das liñas,
asentos, e barras para que os pasaxeiros senten. Atopámonos en Inglaterra, nun dos
escenarios onde as persoas inglesas de clase media pasan moita parte do seu tempo.
Cabe dicir que esta obra foi escrita por Diego Ameixeiras e que a idea orixinal da
mesma foi de Camilo Franco.


A comedia comeza cun problema no metro de Londres cando este se para por
problemas na vía. Nun dos vagóns do tren atopámonos con catro galegos e un inglés
que fala portugués. Ningún dos cinco se coñecen, pero a medida que pasan tempo
encerrados van descubrindo cousas sobre os outros, contando a súa vida e os seus
problemas, e incluso chegan a acadar unha certa relación.

Falando da dirección e actuación, penso que é unha comedia moi realista e obxectivista, pois a idea da trama saíu a partir dun traballo de documentación de Camilo Franco, que foi pola cidade londiniense buscando galegos que vivían alí e preguntando acerca das súas experiencias e emocións. Os personaxes son moi característicos e mostran á perfección a retranca e a personalidade galega, ademais de reflectir a situación de moitos galegos que tiveron que emigrar debido aos malos tempos no noso país e as circunstancias ás que se expoñen.

Nesta obra, os elementos de deseño estaban moi ben preparados e ensaiados, pois a
iluminación e decoración do escenario era moi realista e facían que o espectador se
somerxese no contexto. Ademais, a música dos Beatles nos introduce no mundo
londiniense e a súa canción “Get back” dános unha idea do enfoque da obra e do que
quere transmitir esta. O vestiario e a maquillaxe eran sinxelos pero adecuados á
situación da comedia, esta representaba unha situación cotiá na vida de calquera dos
cinco cidadáns que actúan na obra; tamén, estes dous elementos se axustaban aos
estilos de vida de cada un.

Pareceume unha comedia moi divertida e entretida, que aínda que non cambiara de
escenario nin de personaxes durante toda a obra, non se fixo nada pesada. Ademais non
era un humor parvo, senón que moi traballado, aínda que moito deste mérito o tiñan os
actores, que conseguían chegar a situacións nas que os espectadores non podiamos
parar de rir. Recomendo esta obra a persoas de todas as idades que queiran pasar un bo
rato, pois é adecuada para todos os públicos e o humor é comprensible por todos os
galegos que levamos en vea a famosa retranca.