Samaín 2017



 Estas son algunhas das nosas catrinas da Campaña de resurrección de palabras galegas que levamos a cabo como actividade en 2º de ESO durante este Samaín 2017.



Magosto en Vilalonga


O venres, día 17 de novembro, celebramos o outono cun magosto no patio do instituto. Comemos castañas asadas e divertímonos con xogos tradicionais: o aro, a ra, os zancos, etc.
       Foi un exercicio de convivencia e entretemento.


Divertímonos cos xogos populares.




As castañas

estaban moi boas.




                                        Xogamos xuntos._

25N "Contra a violencia institucional. Xustiza para todas"






Para irmos  traballando o 25N
porque, por desgraza, segue sendo necesario tratar estes temas.





Ligazón do STEG para traballar a violencia de xénero, neste caso a violencia institucional.

Concurso de adhesivos do EDLG do Salnés


Resultado de imagen de imaxes fotos do pergamiño vindelXa está en marcha a nova convocatoria para o CONCURSO DE ADHESIVOS da Coordinadora de EDLG do Salnés.

Este ano o tema é "DO PERGAMIÑO Ó DIXITAL"


Os traballos terán que ser orixinais e inéditos e poden presentarse en calquera formato sobre papel ou cartolina, así mesmo poden empregarse cores e a técnica será libre. Por detrás deberás poñer o teu nome, apelidos, curso e centro escolar.


O prazo de entrega remata o 23 de xaneiro de 2018. 
Resultado de imagen de imaxes fotos do pergamiño vindel

Lembrade que hai dous premios por categoría:

- primeiro ciclo de ESO
- segundo ciclo e FPB 
- bacharelato e ciclos



A nosa ex alumna, Eva Mejuto, publica a súa primeira novela.

.
Eva Mejuto na fotografía da Voz de Galicia, autoría de Ramón Leiro.
A nosa ex alumna, Eva Mejuto (Sanxenxo, 1975), publica a súa primeira novela xuvenil, 22 segundos.Esta novela achégase ó tema da transexualidade a través das vivencias de Alex, o seu protagonista.

Nesta ligazón podedes ler a entrevista completa que lle fan hoxe no xornal La Voz de Galicia, que leva por título "Ser distinto dá medo"

Día da biblioteca 2017



Este curso celebramos o día das bibliotecas: 24 de outubro, cunha exposición titulada: "Visións do máis alá nas artes plásticas". Está exposta no corredor do edificio 1, nela móstranse imaxes da arte galega nas que aparecen demonios, bruxas, pantasmas, etc.

Este tema veunos moi ben, asemade para o samaín que se celebra a finais do mesmo mes.

PARABÉNS A TOD@S @S LECTORES!

ESPERAMOS QUE GOCEDES COA EXPOSICIÓN!


Exposición de fotografías curso 2016/17





Como todos os anos empezamos o curso cunha exposición de fotografías das actividades organizadas pola biblioteca e a EDLG, e destas con distintos seminarios e coa subdirección, o curso anterior: exposicións, conferencias, obradoiros, saídas didácticas, encontros con escritores, etc. O alumnado pode así recordar e verse reflectido nas mesmas.

ESPERAMOS QUE VOS GUSTE!!!!!!!!

Un cantar de cego para espallar as cantigas de M. Codax.

Foto de Área De Normalización Lingüística.

Foto de Área De Normalización Lingüística.
.
Foto de La Voz de Galicia.

Un CANTAR DE CEGO  espalla as cantigas de Martin Codax por 22 vilas de toda Galicia acompañado do panel ilustrado por Luís Davila e interpretado por Luis Correa, O Carrucho, e Chus Iglesias

XXXIV edición dos Premios Xerais 2017



Santiago Lopo, María Canosa e Manuel Lourenzo fixéronse cos Premios Xerais 2017 nun acto celebrado na illa de San Simón, na ría de Vigo. A XXXIV edición do Premio Merlín de Literatura Infantil, dotado con 10.000 euros, recaeu en María Canosa (Cee, 1978) con Muriel, que foi elixida polos membros do xurado entre 35 obras.


Canosa é licenciada en Enxeñería de Camiños, Canles e Portos aínda que leva moito anos dedicándose á literatura. Columnista e colaboradora en varios medios de comunicación, conta cunha ampla obra de narrativa infantil e xuvenil. Muriel naceu, segundo a súa propia autora, de "a necesidade de dar voz á simpleza e complexidade simultánea de espir os sentimentos" a través dunha historia na que "a amizade e unha simple botella de leite" une aos protagonistas que pasan polas páxinas deste libro.


O catedrático de Lingua Galega Manuel Lourenzo (Vilaboa, 1955) recibiu o Premio Jules Verne de Literatura Xuvenil na súa novena edición pola súa obra Ceiba de luz. Lourenzo publicou a súa primeira obra en 1991 e ao longo destes anos recibiu numerosos galardóns como o Premio Carvalho Calero, o Premio Café Dublín, o Merlín ou o Branco Amor de Novela.


Por último, o xurado da XXXIV edición do Premio Xerais de Novela --dotado, do mesmo xeito que os outros dous galardóns con 10.000 euros-- seleccionou a obra A arte de trobar do profesor de francés Santiago Lopo. Lopo (Vigo, 1974) iniciouse na literatura coa tradución de guións cinematográficos en inglés para televisión. Tras isto, publicou na revísta Unión Libre e xa escribiu un total de cinco novelas -Game Over, Peaxes, Hora Zulú, A diagonal dúas tolos e A voz das Nereidas-. A novela A arte de trobar ambiéntase no século XIII e ten o Camiño de Santiago como fío condutor.


https://elpais.com › Galicia



PIPPI MEDIASLONGAS.

Foto de Kalandraka Galicia.
Xa temos na biblioteca escolar a tradución de Pippi  Mediaslongas.

Todas as traducións á lingua galega son ben recibidas, pero esta, en concreto, é máis que aplaudida, porque o personaxe de Pippi forma parte do imaxinario colectivo de varias xeracións, nas cales era difícil atopármonos cunha  heroína  que se enfrontaba á vida totalmente soa, posto que non tiña pais e vivía na compaña dun macaco, o señor Nilsson, e un cabalo.

A  maneira de actuar de Pippi rompía con todos os estereotipos sobre a infancia. E facía que ese personaxe extrovertido, descarado e irreverente coas persoas maiores fose algo completamente insólito para os que daquela  a coñecimos a través dun afamada serie infantil cando eramos pequenos.

Premio Planeta 2017


O xornalista, novelista e investigador Javier Sierra (Teruel, 1971) fíxose co Premio Planeta 2017, o máis relevante por contía económica de España, pola obra: Lume invisible. A finalista foi Cristina López Barrio con Néboa en Tánxer.

A obra gañadora narra a procura do Santo Graal por parte de David Salgas, un experto da Universidade de Dublín, e contén todo o que se pode esperar nunha novela de Sierra: investigación científica, un asasinato e intriga mesturada con moitas doses de erudición. Apunta a éxito asegurado. "É unha novela para ter os ollos moi abertos", recomendou o autor.

A novela finalista, Néboa en Tánxer, é a procura por parte dunha muller do seu amante, ao que coñece unha noite e que desaparece. Misterio, indagación case policiaca e moita literatura protagonizada por Flora Gascón marcan esta obra de López Barrio, que despuntou no panorama literario coa súa segunda novela O ceo nun inferno cabe.



ANTONIO GARCÍA TEIJEIRO, PREMIO NACIONAL DE LITERATURA INFANTIL E XUVENIL


Poemar o marAntonio Manuel García Teijeiro (Vigo, 1952)  súmase á nómina de escritores galegos premiados co PREMIO NACIONAL DE LITERATURA INFANTIL E XUVENIL , o que é unha mostra máis da vizosidade da nosa literatura. Este autor ten unha contribución  moi variada á literatura infantil. Neste caso o libro premiado é un poemario: "Poemar o mar", que forma parte dunha triloxía composta tamén por  «En la cuna del mar» e «Palabras do mar» Estas tres obras teñen o mar como principal protagonista. Xan López Domínguez ilustra a obra pola que García Teijeiro foi galardoado con este premio.


Foto de Celia Torres Bouzas.
PREMIOS NACIONAIS DE LITERATURA INFANTIL E XUVENIL destes últimos anos.

Para seguir a ler máis información sobre esta nova preme esta ligazón da revista Babar.

KAZUO ISHIGURO, NOBEL DE LITERATURA 2017


Foto de Biblio San Paio.
Xa temos PREMIO NOBEL DE LITERATURA 2017, trátase do escritor de ascendencia xaponesa e nacionalidade británica KAZUO ISHIGURO.

Na biblioteca escolar podedes atopar algunha das súas obras como "Non me deixes nunca", traducida ó galego e que tamén conta cunha versión cinematográfica. Esta novela é unha das propostas de lectura optativa do Departamento de Lingua e Literatura Galegas. 



Outra das súas novelas  máis coñecida pola súa adaptación cinematográfica é "O que queda do día"




A campaña para prohibir as armas nucleares, premio Nobel da Paz 2017

 


O premio recaeu no  ICAN (Campaña Internacional para abolir as armas nucleares) que se esforzou por estigmatizar, prohibir e eliminar as armas nucleares.
Esta coalición de asociacións que se estende por uns cen países foi unha forza motriz e un actor líder da sociedade civil do movemento contra as armas nucleares e sumou esforzos para estigmatizar, prohibir e eliminar este tipo de armamento, apunta a argumentación do premio.
O Comité subliñou, como importante argumento para a prohibición das armas, o inaceptable sufrimento humano que provocan e destacou que outros tipos de armamento menos destrutivo como as minas antipersonas, bombas de acio e as armas químicas e biolóxicas xa foron prohibidas por distintos tratados.
 

O galardón chega no medio de tensións entre Estados Unidos e Corea do Norte polas súas probas nucleares e as críticas de Trump ao acordo con Irán