Estudando os mapas

 O alumnado de 1º da ESO fixo, coa súa profesora de xeografía Patricia Díaz, uns mapas físicos con plastilina. A biblioteca expuxos nos corredores por que pensamos que son moi didácticos e un bo traballo. Parabéns.

Arte matemática

O alumnado de 1º da ESO, dirixido polos seus profesores da materia de matemáticas Estela Prol e Arturo Juiz, fixo unhas preciosas obras de arte.  Por moi diferentes que parezan ser, ambas disciplinas, os seus enfoques son similares; as súas longas historias están entrelazadas. Tanto as matemáticas como a arte requiren unha certa creatividade, tanto se se trata de atopar a mellor maneira de resolver un problema desconcertante como do ben e imaxinativo que se pode capturar unha emoción nun lenzo en branco.

Tanto os matemáticos como os artistas deben estirar as súas mentes e imaxinacións para expresar as súas ideas. Ao longo da historia e aínda hoxe, moitos artistas tamén utilizaron as matemáticas para crear e inspirar as súas obras de arte. Durante o Renacemento,  Albrecht  Durero e Leonardo da  Vinci foron famosos por facer que as escenas cobrasen vida nunha superficie plana mediante o uso de cuadrículas e os principios da perspectiva lineal.

Benvida sexa a transversalidade, a creatividade e saber elevarnos sobre o que aprendemos para ir máis alá. Parabéns aos profes e o seu alumnado.

Un pintor-escritor no IES de Vilalonga.

 

Xa hai uns anos que o IES de Vilalonga goza, entre os seus profesores, dun pintor, ilustrador e escritor; falo do compañeiro e amigo Eduardo Pérez Baamonde. Recórdoo sempre pintando, cos seus cadernos de debuxo, plasmando unha rúa, unhas flores, un rostro, un barco... atento a calquera obxecto ou figura que lle inspire unha imaxe. Froito dese traballo foron innumerables cadros, exposicións, ilustracións de libros de contos e cadernos de viaxe, etc.

Naceu en Vilalba (Lugo). En Santiago cursou estudos de Historia da arte, de  Museoloxía e de Artes e Oficios. A partir de  l988 exerce como profesor de Debuxo no Ensino Medio, con destino na actualidade no IES de Vilalonga (Sanxenxo).

Amante do deseño gráfico e da pintura, empezou a crear imaxes e a expoñer a principios dos oitenta e, desde entón, leva realizadas unhas sesenta mostras individuais e máis de cento vinte colectivas.

Este Nadal publicou un álbum infantil orientado a fomentar o gusto polos libros. Non só pola lectura como finalidade esencial, senón polo libro como obxecto de goce, de coñecemento, de consulta, de distracción... O equipo da biblioteca acolle con ledicia esta obra e ademais comparte a mensaxe que transmite.

Grazas Eduardo por formar parte do equipo da biblioteca tantos anos, por colaborar en incontables proxectos, por seguir aí o pé do canón.

Se queredes curiosear na súa obra aquí vos deixo un enlace: https://almacendefabulas.com

Guía de poesía de outono

 Ler poesía é unha experiencia íntima, ás veces abrumadora, ás veces relaxante; pero nunca indiferente.

Achégate á poesía, oirás melodías.

Guía de cómic de outono

 

Aí van as imaxes e referencias dalgúns dos cómics que engadimos á biblioteca este 

 outono. Hai máis. Vinde a buscalos.

Guía de lecturas de outono

Ola a todos/as, aquí vos deixamos algúns dos libros que lemos este outono. Están na biblioteca, vinde buscalos.

Podcast en Historia de 1º de bacharelato

 

Este é o podcast que fixo  Elena Muñíz, alumna de 1º de bacharelato D, como actividade para a materia de Historia do Mundo Contemporáneo que imparte a profesora Patricia Díaz. Pareceunos que merecía ser destacado polo seu bo facer e o seu traballo. O tema:  as revolucións industriais.

Tamén moi destacado foi o traballo de Daniel Castro, deixovos aquí o enlace para que o desfrutedes: 

https://drive.google.com/file/d/1OolIGUIBscyoVxsVe5p7onIeMV1hCmSw/view

Botádelle un ollo.

Árbore de Nadal superorixinal.

 Dende o IES de Vilalonga desexámosvos un nadal fractal (infinita felicidade nun espazo acotado), á semellanza da árbore de Sierpinski, realizada de xeito cooperativo por todo o alumnado da ESO mediante a construción, utilizando técnicas de papiroflexia, de pequenos tetraedros de papel.

Departamento de matemáticas. Gutier Fernández Villar. 

Bo Nadal a todas /os.

 

O equipo da Biblioteca do IES de Vilalonga felicita o Nadal e desexa un próspero e máis tranquilo Ano Novo a toda a Comunidade Escolar.

Ánimo e forza!!!

Obradoiro de animación (21 días de galego)

  O xoves 17 de decembro tivemos a oportunidade de gozar coas achegas de Borja Guerrero e Carlos Madureira, da editorial OQO, ao mundo da animación. Foi un obradoiro no que coñecemos a historia desta arte e nos explicaron varios aspectos sobre o incrible mundo das imaxes en movemento, de como funciona o noso cerebro no campo visual, das necesidades técnicas neste traballo, os primeiros obxectos ou "xoguetes" relacionados con el... E logo chegou o mellor: facer as nosas propias animacións en plastilina coa app Stop Motion. Encantounos deixar saír o lado creativo e comprobamos que algúns participantes teñen moito xeito e poden acabar sendo uns artistas de primeira!

 

Un ilustrador no IES de Vilalonga

 

O profesor de plástica Eduardo Pérez Baamonde fixo esta fermosa e interesante acuarela. Titúlase Enredante (en-red-ado), nela un mozo aparece facendo un selfie diante dun panel cunha paisaxe caribeña. Ten os pés afundidos en lastres de cemento con iconas das redes sociais. No chan espallados hai: unha botella, unha caixa de pizza, cabichas, un cinceiro... Non sabemos se está dentro ou fóra pero a parede está esconchada.

Sen dúbida quere transmitir varias mensaxes:

- Queremos aparentar o que non somos.

- Sublimamos modelos ou estilos de vida inalcanzables e enganosos.

- O consumismo a ultranza fainos máis pobres e sectarios.

- Non importa o que se é, senón a imaxe que os demais teñan de ti.

Parémonos a reflexionar, vivimos nunha cultura que se esconcha, que todo o quere rápido e pasaxeiro; o ser humano precisa tempo para formarse, para pensar. Non fagamos caso de todo aquilo que quere atraernos e confundirnos con cantos de serea. Non nos deixemos levar por unha subcultura superficial, enganosa e consumista.

O outono a concurso!

 

RETO: PALABRAS, DITOS E FEITOS DO MES DE SANTOS

-Novembro de estío, a porta do frío.

-Polo novembro as noites van crecendo.

-A cada porco chégalle o seu San Martiño.

- O día de San Martiño, proba o teu viño.

-Ata san Martiño, pan e viño. De san Martiño adiante, fame e frío.

-Sembra trigo en San Martiño, cada día un pouquiniño.

-Se novembro comeza ben, confianza has de ter.

-Do 20 de Novembro en diante, o inverno xa é constante.

-Polo San Simón pon o tapón, polo San Martiño proba o viño.

-Polo San Andrés, colle o porco polos pés, a galiña polo rabo e levaos ao mercado.

-Novembro acabado, inverno empezado.

-Se novembro empeza ben, nada hai que temer.

-Polo novembro, as noites van crecendo.

-Entre santos e natal inverniño caroal.

-No día de defuntos, memoria e frío van xuntos.

-O veranillo de San Martín, dura tres días e fin.

-O veranciño de san martiño dura tres días e un pouquiño.

-En novembro voan casas, vén o vento.

-De Santos ó Nadal é o inverno natural.

-Polo mes de Santos, xa baixa a neve ós campos.

-Por tódolos santos, neves nos altos.

-San Xoán garda a chave do pan , San Martiño a do viño e San Andrés a do porquiño.

-Castañas, noces e viño fan a ledicia de San Martiño.

-Por Todos os Santos, frío nos campos.

-Do San Martiño en adiante, non hai demo que o aguante.

-San Xoán trae o inferno e San Andrés o inverno.

-Polo San Martiño ,o teu mosto xa é viño.

-Cada cousa no seu tempo e os nabos en adviento.

-No mes de nadal o carón da lareira vaite sentar.

-Polo Pilar os nabos a terra e o viño envasado.

-Despois de San Martiño vén o inverno de camiño.

-Por san Martiño, proba o teu viño.

-Auga de San Martiño come pan e viño.

-Antes de san Martiño, pan e viño; despois de san Martiño, fame e frío.

-Chegan os defuntos e chegan os corvos todos xuntos.

-No vinte de Novembro en diante, o inverno é constante.

-Horta de San Martiño, mantén ao seu dono e máis ao veciño.

-Auga de agosto, nin bo viño nin bo magosto.

- Estamos no outono os paxaros marchan xa, o día é mais curto e o frío vai chegar.

Estamos no outono as follas van ao chan temos unha alfombra de cores

para xogar e pisar.

Alumnado de 4º ESO

 

Día das librarías

O 13 de novembro celebrouse o Día das Librarías, eses pequenos comercios cercanos que atesouran miles de mundos por descubrir. Queremos agradecerlle desde aquí o seu esforzo  por asesorarnos e axudarnos a diario.

 Todos tus Libros.com é a plataforma da pequena e mediana librería que acaba de incorporar o comercio  online ás súas prestacións de consulta, difusión cultural e interacción co usuario. Un proxecto estratéxico, de carácter colectivo e asociativo, cunha filosofía participativa, co que queremos achegarnos ao consumidor dixital pero sen renunciar aos principios que nos caracterizan: a diversidade libreira, a atención personalizada, a  bibliodiversidad e o noso papel cultural.

Nun momento social, sanitario e económico tan complicado, coa celebración do Día das Librerías queremos destacar o noso esforzo por manternos vivas e activas, dinamizando as nosas contornas, xerando cultura e comunidade a través dos libros e as lecturas, ademais de darvos as grazas por elixirnos e por defender o voso espazo e tempo individual de lectura.

CEGAL: Confederación Española de Gremios e Asociacións de Librarías.

Premio Nacional de cómic 2020

 

O  historietista Javier de  Isusi foi galardoado co Premio Nacional de Cómic 2020 pola súa obra A divina comedia de Óscar  Wilde.

Este cómic editado pola editorial Astiberri en 2019 ten como obxecto distinguir a mellor obra desta especialidade publicada en calquera das linguas do Estado durante o ano 2019.

Ademais, o xurado premiou a obra de  Isusi (Bilbao, 1972) por ter unha "introdución e final que evocan a representación do teatro da vida, e unha brillante caracterización dos personaxes mediante o acertado recurso de entrevistas individuais".

Na divina comedia de Óscar  Wilde o autor transforma a admiración e xenerosidade que profesa ao escritor irlandés nun cómic onde  fabula sobre os seus últimos anos de vida.

O xurado destacou ademais "o excelente dominio da acuarela de tinta  sepia, con sutís transparencias e diferentes planos de profundidade marcados polo virtuosismo no emprego  tonal dunha mesma gama cromática".

Javier de  Isusi estudou arquitectura nas escolas de San Sebastián e Lisboa. Acabada a carreira, probou brevemente a profesión e emprendeu unha viaxe que lle levou durante un ano para percorrer boa parte de Latinoamérica. Ao volver desa viaxe decidiu dedicarse ao que sempre quixo facer: contar historias en viñetas.

                Book trailer incluido no artigo do periodista Jesús Jiménez sobre a obra premiada. RTVE.

Día das escritoras

 O IES de Vilalonga únese a celebración do Día das escritoras. Desde a Asesoría de Bibliotecas escolares de Galicia alentóusenos a participar para que todos/as recoñezamos e valoremos a creatividade e o traballo das nosas escritoras, a miúdo tan difícil e silenciado.

Blog de Bibliotecas escolares:  O Día das Escritoras é unha iniciativa promovida pola Biblioteca Nacional de España en colaboración coa  Federación Española de Mujeres Directivas, Ejecutivas, Profesionales y Empresarias (FEDEPE) e coa Asociación Clásicas y Modernas. Desde 2016 búscase reivindicar o labor e o legado das escritoras a través da historia.

 

Elvira Lindo, comisaria de la V Edición del Día de las Escritoras 2020:
"Bien se podría decir que la literatura escrita por mujeres está a menudo espoleada por una conciencia esencial del esfuerzo. En clave autobiográfica o como representación de una colectividad destinada a un trabajo poco o nada reconocido las mujeres expresan cuánto trabajo precisa el acto de amar, de tener hijos o de desear la soledad, cuán férrea voluntad hay que reunir para defender una vocación al tiempo que se cumple con las tareas que ha acarreado tradicionalmente la condición femenina. La voz de las mujeres suele exhalar un aliento esforzado, una conciencia constante de que la vida siempre ha de exigirles más que a los hombres.

De Teresa de Jesús a Idea Vilariño, de Luisa Carnés a Alfonsina Storni, pasando por Elena Fortún, Luz Pozo, Concha Méndez, Mercé Rodoreda, Circe Maia, Gabriela Mistral y tantas otras en cuya escritura se refleja el esfuerzo de vivir, la vida trabajada, el cansancio y la voluntad de cumplir, a pesar de las trampas del camino, con una vocación tozuda e intensa."

Eva Mejuto "Memoria do silencio" (Editorial Xerais):

"Tócanos facer as cousas ás agachadas, que non se note que estamos, porque somos invisbles como o ar. O que non saben, ou non pensan, é que o ar se coa en todos os recantos precisamente poque non se ve. Así facemos nosoutras."

O Instituto de Vilalonga organizou unha actividade para visivilizar este Día  para a comunidade escolar: alumnado de 4º da ESO  e 1º de bacharelato cubriron fichas, feitas polas súas profesoras de galego e coordinadas pola profesora Ana Belén Vázquez Pardal, sobre escritoras galegas contemporáneas.  Organizamos os seus traballos nun vídeo e engadímoslle a voz de Silvia Penas recitando: Elas. O vídeo foi proxectado na pantalla da entrada do instituto e deixámolo aquí para todos/ as.

Os alumnos/as que participaron foron:

4º ESO A:  Claudia Pérez Viñas , Inés Sineiro Domínguez, Marta Novas Fernández, Marta Vilar Abal, Mateo Rozas Pérez.

4º ESO C: Noelia Montes Camiña.

1º BACH A: Gabriel Folgada González, Iago Alonso Barriga, Julia Soutullo Parada, Mario Santiso Ferreirós, Nicolás Freijeiro Vázquez.

1º BACH D: Daniela Otero Vázquez, Elena Muñiz Domínguez, Nerea Fernández González, Daniel Castro Besada, Natalia Sabarís Hernanz.