O pasado 11 de febreiro Manuel Portas estivo charlando co alumnado de 1º de Bacharelato que leu a súa primeira novela Denso recendo a salgado.
Nesta novela, que se desenvolve a través dunhas secuencias narrativas, que van marcando as distintas horas dunha semana, preséntasenos unha batea de personaxes ensarillados entre eles por unha serie de relacións persoais, que os vencellan desde o seu pasado compartido no curso de "sexto letras", co narcotráfico como telón de fondo na zona do Salnés. Pero isto non é máis que unha pretexto para facer un profundo retrato dunha xeración que ronda hoxe os cincuenta anos.
Manuel Portas contestando ás preguntas dos nosos alumnos falou do significado do título do libro, unha pequena licenza pola súa parte para describir o recendo das nosas rías fronte ó mar de Barcelona, no que pasou os seus primeiros anos. Tamén se tratou a posibilidade de facer unha segunda parte da historia, para o cal comentounos que era unha porta que quedaba aberta, pero que nestes momentos xa tiña outra obra no prelo e agora estaba a escribir unha historia moi distinta con moito humor.
Como colofón á súa intervención, Clara Pino acompañada da súa arpa interpretou unha peza dedicada ó Viquingo, un dos personaxes da novela. Clara Pino, profesora de ensino secundaria foi integrande dos grupos: Sete Saias, Covalblú e actualmente acaba de sacar un disco co seu novo grupo Loaira.
Ningún comentario:
Publicar un comentario