BENVIDOS AO CURSO 2016/17

DESEXÁMOSVOS UN FELIZ PRINCIPIO DE CURSO E QUE TODO VOS SAIA BEN ESTE ANO.

ÁNIMO RAPACES!

VINDE A VISITARNOS A BIBLIOTECA E PARTICIPADE NAS NOSAS ACTIVIDADES!

Día Europeo das Linguas

Onte, 26 de setembro, celebrouse o Día Europeo das Linguas, que se vén conmemorando desde o ano 2001, data na que o proclamou o Consello de Europa co apoio da Unión Europea.

Nesta páxina podedes atopar moitos recursos para indagar sobre o plurilingüismo

Na celebración desta data tamén encontramos un pequeno recuncho para a lingua galega.

Agustín Fernández Paz na nosa memoria

Coñecín a Agustín no ano 2006 no I Seminario de Dinamización Lingüística no Ensino do que fun coordinadora, que se celebrou en Pontevedra no instituto Gonzalo Torrente Ballester, entre outras localidades galegas. Era un tempo no que se abría un certo porvir en materia de normalización lingüística, aínda hoxe sen materializar, en Galicia e Fernández Paz era o encargado dun relatorio que levaba por título "O labor dos centros educativos na normalización lingüística". 

Era un home entusiasta que acaba de retirarse do ensino, non gustaba de conducir e menos de ter que agorcharse da choiva nas estacións de servizo que deseñou o Norman Foster para Repsol, máis pensadas, como dicía el,  para Arabia Saudí que para un pequeno país no que a choiva acompaña acotío e precisamos gorecernos dela. Tamén lembro os seus comentarios sobre a perda de falantes e o feito de termos que ser ensinantes en certo tipo de centros escolares, que son, por desgraza,  zona cero de galegofalantes, como foi o seu caso no seu último destino vigués.

Ese mesmo ano tiven a oportunidade de que volvese ó IES Torrente Ballester a impartir unha charla ó alumnado sobre os seus libros: Trece anos de Blanca e Noite de voraces sombras. No café confeseille que o motivo de recomendar este segundo libro era un pouco sentimental, posto que parte da historia transcorre na miña terra, Viveiro. El comentou que era alí onde pasaba os veráns de cativo. Accedeu tamén a que os alumnos lle fixeran unha pequena entrevista, que foi publicada na revista escolar, "Aula Máxica".

Xa neste centro, tentei de novo unha  visita para tratar sobre esta mesma novela. Nesta  ocasión a súa resposta foi abraiante  pola súa sinceridade, xa que me confesou a súa enfermidade e as incomodidades que esta lle provocaba á hora de visitar os centros. Ofertoume a posibilidade dunha videoconferencia para a cal non estabamos preparados. Agradecín a súa cercanía, dado que o noso trato era meramente profesional e non tiña porque me dar tantas explicacións. Nesa ocasión, hai agora xa catro anos,  cos rapaces do Club de lectura decidimos visitar a illa de San Simón e procurar alí as pegadas do libro, algunhas de nós buscamos nas paredes do cemiterio o anel da historia coa esperanza de atopalo.  "Foi coma se o tempo quedase suspendido e, por uns instantes, as paredes e a illa enteira desparacesen da nosa vista. Nós soas, entre o mar e o ceo, rodeadas por aquela presencia invisible que nos envolvía"

Noite de voraces sombras

Este verán, no que as profes andamos a procurar novas historias para alimentar os nosos lectores, sorprendeunos coa mala nova do teu pasamento. Supoño que aquí tamén se detivo o tempo para moitos dos teus lectores, pero neste intre detido pódeste ir co convencemento de que non  quedamos soas entre o mar e o ceo, posto que nos deixas un ronsel de historias ensarilladas na nosa memoria colectiva e que prenderán, sen dúbida,  na memoria dos teus lectores futuros facendo a túa presenza creadora invisible sempre posible.

Premio biblioteca escolar solidaria 2016

Trala valoración das candidaturas presentadas para o SELO "BIBLIOTECA ESCOLAR SOLIDARIA" deste ano 2016, na reunión da comisión de valoración de candidaturas, do pasado 13 de xuño, acordouse  a concesión do selo aos seis centros que se relacionan:

Centro	Concello	Provincia
CPI P. Virxe da Cela	Monfero	A Coruña
CEIP P. A Pedra	Bueu	Pontevedra
CEIP Espedregada	Poio	Pontevedra
IES de Poio	Poio	Pontevedra
CEIP de Parada-Campañó	Pontevedra	Pontevedra
IES de Vilalonga	Sanxenxo	Pontevedra

A resolución da Dirección Xeral de Centros e Recursos Humanos coa concesión do selo, foi publicada  no Portal Educativo, e  pode verse neste enlace:
http://www.edu.xunta.gal/portal/node/19260

Tamén está publicada na páxina de Bibliotecas Escolares: http://www.edu.xunta.es/biblioteca/blog/?q=node/880

Como se di na propia resolución, este selo é un distintivo de calidade en termos de traballo solidario e a favor da comunidade escolar, e isto sempre no contexto das funcións da biblioteca como biblioteca inclusiva a favor da igualdade de oportunidades.

Parabéns a toda a comunidade escolar!

Felices vacacións!

O mércores 22 rematou o curso 2015-16, dende a biblioteca desexámosvos unhas boas vacacións a todos/as e acordádevos de volver en setembro que empeza outro.

   Celebramos este día con actividades diversas:

- O profesor Juan Ventoso de música deleitonos con varias actuacións do seu alumnado agrupado por niveis.

- A biblioteca entregou os premios os mellores da "Hora de escribir" e dos Power point da saída cultural a Ourense.

- Actuou o grupo de música Venomous Pink. 

A gozar do verán e descansade!

ALUMNADO PREMIADO NO CONCURSO LITERARIO DO IES DE SANXENXO

As alumnas do noso centro que resultaron premiadas no XI Certame Literario que organiza o IES de Sanxenxo foron: 

 

ÉRIKA CACABELOS FERNÁNDEZ (Primeiro premio na categoría B)

MARTINA BASDEDIÓS TILVE (Segundo premio na categoría C)

ANA RODRÍGUEZ DOMÍNGUEZ (Primeiro premio na categoría D)

EVA GONZÁLEZ KÖLMEL (Segundo premio na categoría D)

INÉS REY SOUTULLO

(Terceiro premio na categoría D)

Resultaron finalistas: 

EVA BASDEDIÓS TILVE (categoría B), LIDIA DADÍN CAMIÑA, IRIA OTERO RIVEIRO, MIREIA OTERO LEIRO, RAQUEL TORRES CHAN, ANDREA PENAS GONDAR, ROCÍO MATILLA NÚÑEZ E CARLOTA DOMÍNGUEZ DOMÍNGUEZ (categoría D).

Exposición do Concurso de adhesivos 2016

A pasada semana contamos no centro coa exposición dos gañadores e seleccionados no XXII Certame Gráfico pola Normalización Lingüística que organizan os EDLG dos centros escolares da comarca do Salnés. Este ano o gañador do noso centro foi JUAN CARLOS PINTOS CAMIÑA de 2º de ESO A.

Foron seleccionados como finalistas: 

NEREA CAMIÑA TOURIÑO e ÉRIKA CACABELOS FERNÁNDEZ na categoría de primeiro ciclo de ESO. 

MARTINA BASDEDIÓS TILVE na categoría de segundo ciclo de ESO. 

INÉS REY SOUTULLO, NEREA TORRES MONTES e LAURA GONZÁLEZ MUÍÑOS na categoría de bacharelato.

A Coordinadora está composta por un total de 13 centros de Ensino Secundario do Salnés, dos cales 12 presentaron traballos ao concurso: IES Miguel Ángel González, IES Castro Alobre, IES Armando Cotarelo, IES Bouza Brey,IES A Basella, IES Faro das Lúas, IES Illa de Arousa, IES RamónCabanillas, IES Francisco Asorey, IES Vilalonga, IES Monte da Vila, IES de Barro e CPI Mosteiro.

Lendo mitos clásicos

Un grupo de alumnos e alumnas de 3º ESO leron unha serie de mitos clásicos ao longo do curso e elaboraron unha exposición sobre algúns deles. Aquí vos deixamos unha mostra.

               

Os "crepes" de Vicente Straehli

Filloas, non si?

Murais de Manuel María e Rosalía

O alumnado de 4º de ESO baixo a dirección do profesor de plástica, Eduardo P. Baamonde, realizou durante este último trimestre dous enormes murais cos retratos de Manuel María e Rosalía de Castro. Ambos os dous xa están adornando as paredes do noso centro.