TERCEIRO E CUARTO DE ESO VAN Ó TEATRO

 

O día 3 de abril o alumnado de 3º e 4º de ESO  asistiu a unha representación no auditorio de Cambados. Foron Os Quinquilláns,   partindo de textos de Madein Galiza de Séchu Sende,  os encargados de mostrar algúns dos prexuízos lingüísticos que afectan á nosa lingua.

 Estas son manifestacións do noso alumnado despois de ter asistido á representación:

“Unha obra cunha mensaxe moi importante. O galego forma parte da nosa cultura, é a nosa lingua e temos que falala e coidala para que os fillos dos nosos fillos tamén a falen. (...) Oxalá nunca se perda a nosa lingua”. (Alba González)

“Recomendo profundamente esta obra para aqueles que consideren que o galego non é unha lingua. Ó contrario, o galego é unha lingua máis, unha lingua románica e lingua oficial en Galicia. (...) A adaptación do texto Madein Galiza axuda á normalización lingüística”. (Gabriel Folgada)

“A representación mostraba unha nena que falara galego ata que un día na discoteca Koyote atopou un “atrapalinguas” que lle quitou a súa lingua”. (Lucas Cores)

“Falou galego moito tempo, ata que un día foi de festa e un home de LanguagePlanning lle arrincou de novo o galego e comezou a falar castelán outra vez”. (Adrián Míguez)

“Hai unha axencia con persoas que intentan que desapareza o galego. Para conseguilo, vanlle corrixindo ós falantes de galego cada palabra ata roubarlles a lingua”. (Nuria Carballa)

“Mediante unha metáfora, móstrase  como o galego vai sendo menos utilizado debido ós prexuízos: os  “ ladróns de palabras” eran un grupo de persoas pertencentes a unha organización que quería destruír o galego”. (Lucía Villanueva)

“A perda da lingua simbolízase cunha persoa chamada Roba Palabras, que animaba á protagonista, Estrela, a deixar o galego. A pesar das dificultades (a familia, o instituto, as persoas da empresa que convencen os galegos para que falen en castelán), o galego séguese utilizando xeración tras xeración”. (Jaime Camiña)

“Chegou á panadaría de sempre e pediu  pan en castelán, pero o dependente dálle pans galegos (de Carral, de Cea...) e ela probou un cachiño e recuperou a lingua”. (ÁlexCacabelos)

“Vese a evolución lingüística que sofre a protagonista. (...) Ao final, Estrela lembra cal é a súa propia lingua e  está decidida a ensinárllela aos seus fillos , o galego.  (...) Cada vez son máis as persoas que deixan de falar galego para falar castelán polos prexuízos lingüísticos, pero esta obra ensínanos a apreciar a nosa lingua”. (Daniel Castro)

“Fronte ó desprezo dos falantes de castelán cara ó  galego e á obsesión por unificar todos os idiomas para crear unha única  “lingua do futuro”, transmítenos que o galego non é un castelán mal falado, que cada lingua é unha gran riqueza e que nós debemos apreciar esa riqueza que posuímos”. (ÁngelBerreco)

“Resultou interesante porque mostra o desprezo que sofre o galego no seu propio lugar”. (Alexia González)

“Unha obra presentada polo grupo Os Quinquilláns, que aínda sendo de corte humorístico, trata un tema serio como é a conservación da lingua. (...) Unha obra que contén unha mensaxe moi importante que non debemos esquecer”. (Mario Santiso)