Gañadores concurso "O meu outono en fotos"

 Xa temos persoas gañadoras do concurso "O meu outono en fotos", Cris e Álex de 2º de FPB ADM.

Parabéns!!






Día Internacional das Bibliotecas


 

Por que se celebra o Día Internacional das Bibliotecas?

En 1992, a Biblioteca Nacional de Saraievo quedou totalmente en ruínas debido ao conflito bélico dos Balcáns. A imaxe que quedou gravada na mente do mundo foi a do músico  Vedran  Smailovic, tocando o seu violonchelo entre os entullos do fermoso edificio.

Pero, Por que atacar unha biblioteca?  Máis aló de que ao longo da historia, moitos tiranos como Hitler, visen nos libros unha fonte de franca oposición e os mandasen   queimar en grandes fogueiras, a realidade é que o que detonou a destrución da Biblioteca de Saraievo, foi a súa arquitectura que incorporaba elementos de tradición árabe e oriental, lembrando a todos os que pasaban por diante dela que xa non formaban parte do Imperio Otomán (Turco).

Memoricidio, Que é e por que garda relación con esta festividade?

O  memoricidio é a palabra que se utiliza para describir a destrución do acervo cultural dun pobo. O médico e historiador croata  Mirko D.  Grmek, utilizou por primeira vez este termo nun discurso ante as Nacións Unidas, dando orixe non só á palabra senón ao propósito deste organismo de evitar que este tipo de crimes de guerra seguisen ocorrendo no mundo.

A biblioteca do IES de Vilalonga celebra o 24 de outubro publicitando  esta data e repartindo libros entre o alumnado. Respetade, coidade e gozade a nosa biblioteca é de todos/as.



Taller de regueifas

 

O 14 de outubro  fixemos un obradoiro de regueifas na biblioteca do IES de Vilalonga, a idea é achegar a poesía, a regueifa e a improvisación, dunha maneira lúdica, ao alumnado; coa finalidade de fomentar a oralidade, a creación artística, eliminar prexuízos lingüísticos e recuperar a regueifa como unha tradición propia e un medio de  aprendizaxe da poesía.

Durante este taller, o alumnado de cuarto da ESO aprendeu a improvisar oralmente os seus poemas en galego da man da  regueifeira  Lupe Blanco. O estudantado tivo ocasión de mostrar os coñecementos adquiridos  regueifando cos compañeiros.



OS CICLOS DE AUTOMOCIÓN DO IES DE VILALONGA EN EDUGAL

Os días 20, 21 e 22 de outubro levouse a cabo no Recinto Feiral de Pontevedra EDUGAL, salón educativo de referencia en Galicia, que trata de darlles resposta ás necesidades de información sobre a oferta formativa e orientación educativa de estudantes, centros, profesionais da educación e familias.













As claves de EDUGAL son dar continuidade á orientación académica e facilitar unha adecuada elección para tomar unha decisión sobre o futuro profesional nun salón que axuda ao estudantado a decidir eficazmente o seu futuro formativo e profesional e cunha ampla oferta de centros educativos e formativos, empresas e entidades que dan resposta ás necesidades de formación do alumnado que necesita elixir o centro no que formarse para acceder ao mercado laboral.




Neste marco tan importante para o futuro do noso alumnado atopamos un expositor dos ciclos de Automoción do IES de Vilalonga.
Parabéns ao profesorado e alumnado que estes días participou en EDUGAL non só para dar a coñecer o traballo que se desenvolve no noso centro e as saídas que estes ciclos ofrecen, senón polo importante labor de formación e cooperación persoal que saben transmitir.

Premio Planeta 2021


 

Os gañadores do Premio Planeta 2021 desvelan como xurdiu o nome de Carmen Mola

Quen está detrás de Carmen Mola? Esa é a pregunta que máis se repetía onte á noite cando se deu a coñecer o gañador da 70ª edición do Premio Planeta. O quen resultou ser varios guinistas: Antonio  Mercero, Jorge Díaz e Agustín Martínez deron a sorpresa ao desvelarse como os creadores da inspectora Elena Blanco.

En Por fin non é luns de Onda Cero, coñecemos un pouco máis de preto aos tres guionistas que se fixeron co galardón pola obra 'A besta' e que nos relatan como foi o momento no que decidiron utilizar o nome de Carmen Mola.

"O nome saíu en dous minutos. Foi como unha especie de broma. Nun momento saíu o nome de Carmen, alguén dixo "mola" e así quedou: Carmen Mola", revela Agustín Martínez.

Antonio  Mercero recoñece que, a pesar de que poida parecer o contrario, non lles resultou nada complexo construír as historias entre os tres porque iso permitiulles escribir contido máis orixinal: "sumabamos os talentos de tres guionistas afeitos a traballar en equipo e, só sendo capaces de deixar o ego na porta, démonos conta de que podía saír algo bonito. Xuntar a tres persoas, seis mans, na mesma habitación mellora moito as cousas".

Antonio  Mercero dixo sobre “A besta”  que o xurado premiou unha obra ambientada no Madrid de 1.834, cunha epidemia histórica de cólera e restricións "moi similares" ás da COVID-19 e con crimes macabros de ficción.

ondacero.es

Madrid | 16.10.2021 11:17

 


XESÚS FRAGA, Premio Nacional de Narrativa 2021

  O autor Xesús Fraga é o recente gañador do Premio Nacional de Narrativa 2021 coa súa obra Virtudes (e misterios).

 Este premio é concedido polo Ministerio de Cultura e Deporte. O xurado escolleu esta obra “por amosar cunha prosa moi coidada, no fondo e na forma, a historia de dúas xeracións de mulleres valentes dunha familia en tempos hostís, e adentrarnos nun relato sobre a emigración galega en Inglaterra e América”.

Ademais, o xurado sinala: “Con esta novela contemplamos a inmigración, cos seus claros e escuros, desde as súas dúas beiras, a dos que marchan e a dos que quedan e tamén desde o punto de vista dos que viven a cabalo entre dous mundos”.

(Fonte: Falamos de libros (Ed.Galaxia))

CONTAMOS CONTOS DE MEDO!!!






PONTE EN CONTACTO CON NÓS

 (edlgbib.iesvilalonga@gmail.com) 

  

AXÚDANOS A CREAR 

UNHA BASE DE AUDIOS 

CON CONTOS DE MEDO 

CONCURSO DE DECORACIÓN DE SAMAÍN

 

BASES: 

• Participación. Todo o alumnado do IES de Vilalonga dividido en tres modalidades: 

ESO+FPB // BAC+ciclos+ESA // PROFESORADO+PND.

A participación pode ser individual ou en grupo. Cada persoa/grupo debe anotarse e asignaráselle un espazo ou mesa para decorar. Estes espazos/mesas só estarán identificados cun número e non poderán levar nome nin ningún outro tipo de elemento que permita identificar a persoa(s) autora(s).

• Temática: decoración con cabazas, elementos do outono (castañas, ourizos, cogomelos, follas...) e outros elementos propios da nosa cultura. Non vale imitar escenas de Halloween nin usar monstros doutras culturas (si serven pantasmas, Santa Compaña, mortos...)

• Será valorada a creatividade, estética, orixinalidade... do conxunto.

• O prazo límite para a montaxe da decoración será o 28 de outubro. O xurado, composto por un membro do equipo directivo, a coordinadora do EDLG e a de Biblioteca, decidirá cales son as decoracións premiadas. 

As montaxes gañadoras en cada categoría daranse a coñecer o 2 de novembro e estarán expostas no IES e nas diversas canles de difusión/información deste. 

Poderán quedar premios desertos se a calidade das montaxes non alcanza uns mínimos axeitados.

• O premio consistirá nun vale para consumo na cafetería e un cómic de superheroes galegos.

• Participar neste concurso implica aceptar as presentes bases.

O MEU OUTONO EN FOTOS

 O MEU OUTONO EN FOTOS 



Con que imaxe e pé de foto reflectirías mellor o teu outono? 

BASES: 

• Pode participar todo o alumnado do IES de Vilalonga dividido en tres modalidades: 

ESO+FPB // BAC+ciclos+ESA // PROFESORADO+PND.

• Temática: imaxes relacionadas co outono (só unha por participante).

• Foto en formato: JPG (ou JPGE), GIF e PNG

• Pé de foto en galego: imprescindible e acorde coa imaxe. Pódense coller prestadas palabras doutras persoas sempre que citemos a autora ou autor.

• Envío: FOTO + PÉ DE FOTO + NOME, APELIDOS E CURSO DO/APARTICIPANTE, escrito a ordenador, debe ser enviado ao enderezo electrónico: biliotecaiesvilalonga@gmail.com

• Será valorada a creatividade, estética, orixinalidade... do conxunto formado pola imaxe e o texto.

• O prazo de entrega remata o 20 de novembro.

• O premio consistirá na conversión da foto nun póster cun exemplar para o/a participante e outro para o centro e un bono dun bocadillo.

• As fotos premiadas daranse a coñecer en decembro e estarán expostas no IES e nas diversas canles de difusión/información deste.

• Participar neste concurso implica aceptar as presentes bases.

EDLG / BIBLIOTECA

Premio Nobel de literatura 2021

 

 

 

A Academia Sueca  resolveu que o Premio Nobel de Literatura 2021 é para o novelista nado en Tanzania e residente en Reino Unido: Abdulrazak  Gurnah. O xurado concedeu este premio polo seu "interese nos efectos do colonialismo e o destino dos refuxiados e a súa relación con culturas e continentes".
Nacido en  Zanzíbar en 1948,  Gurnah instalouse en Inglaterra a finais dos anos sesenta e é autor de novelas como ' Memory  of  Departure', ' Pilgrims  Way', 'Dottie', ' Paradise', ' Admiring  Silence' ou ' By  the Sea'.

 

 

 

  Parabéns profesor!