1 de abril-Día das Artes Galegas

Mestre Mateo, Castelao, Maruja Mallo, Alejandro de la Sota. Non era cousa sinxela estar a altura coa figura homenaxeada no Día das Artes Galegas 2019. Pero a Real Academia Galega de Belas Artes (Ragba), en sesión celebrada o pasado sábado no salón reitoral do compostelán colexio de San Xerome, deu no cravo: acordou, por aclamación, dedicarlle o ano 2019 -en especial, na xornada do 1 de abril- a Luis Seoane López (Buenos Aires, 1910-A Coruña, 1979), proposta que tiñan subscrito un grupo de académicos e varios colectivos culturais do país.

A vida de Seoane, lembra a Academia, foi unha longa viaxe á través do século XX. Formado na época da ditadura de Primo de Rivera, loitador nos anos da República, fuxido en 1936, organizador e promotor da vida cultural no exilio, viaxeiro polo mundo e atento aos múltiples discursos que ía xerando a súa época, o artista foi testemuña de excepción deste século axitado e convulso. A súa obra, vasta e diversificada, o seu pensamento aberto, as súas iniciativas, convérteno nun personaxe destacado no panorama galego e español do século XX, que axudou a construír co seu esforzo, talento e compromiso.

A obra de Seoane é unha simbiose entre o afán por evocar a arte tradicional de Galicia, manifestado a través dos petróglifos e da enorme presenza do románico, e a arte das vangardas históricas, admiradas polo pintor galego xa desde a súa etapa como estudante de dereito en Compostela. Foi autodidacta na súa aprendizaxe plástica, e a súa curiosidade e admiración pola Galicia dos seus antepasados e pola arte en xeral foron os motores do seu coñecemento.

La voz de Galicia.

Maruja Mallo, Día das Artes Galegas 2017

Maruja mallo de Joseantonio Villaverde

Emilio Ínsua veu contarnos a Maruja Mallo

Aínda que semelle difícil falar dunha figura tan emblemática como a nosa pintora Maruja Mallo, o noso colega Emilio Ínsua sabe como ninguén transmitir a vida e obra desta figura tan potente e tan descoñecida, sobre a cal ten un ensaio titulado: Maruja Mallo: de prometedora pioneira a artista universal. Materiais para unha biografía exacta e completa da pintora viveirense entre 1902 e 1936, co cal gañou en colaboración con Carlos Nuevo Cal o XXIII Premio Literario Ánxel Fole no 2009

A nosa pintora vangardista está na nómina das mulleres invisibilizadas e o que noutro país é case unha operación de mercadotecnia internacional, como acontece con Frida Kahlo, no noso queda na marxe das explicacións da Xeración do 27, ou na sombra dalgúns dos  seus representantes máis ilustres como Rafael Albertí ou Miguel Hernández, como se non fose ela quen os asombrase.

O relatorio estivo presentado polo profesor e pintor, Eduardo P. Baamonde, que traballou co alumnado de 3º de ESO a etapa dos seus retratos de mulleres. Tamén contamos coa presenza do alumnado de 1º de bacharelato.