Ler poesía é unha experiencia íntima, ás veces abrumadora, ás veces relaxante; pero nunca indiferente.
Achégate á poesía, oirás melodías.
Guía de cómic de outono
Aí van as imaxes e referencias dalgúns dos cómics que engadimos á biblioteca este
outono. Hai máis. Vinde a buscalos.
Guía de lecturas de outono
Ola a todos/as, aquí vos deixamos algúns dos libros que lemos este outono. Están na biblioteca, vinde buscalos.
NACE O CLUB DE LECTURA EX LIBRIS NO IES DE VILALONGA
O certo é que conformar este grupo supuxo xa inicialmente a
dobre satisfacción da boa acollida que tivo e do que isto supón nun ano como o
que estamos a vivir, pero a xuntanza de hoxe significou ademais compartir entre
persoas que nos vemos cada día no traballo outra parte de nós, a da curiosidade
das vivencias, a interpretación das emocións, das vidas dos outros, eses aos
que axexamos en cada páxina, ás veces procurando moldealos aos nosos desexos,
outras, procurando que nos sorprendan...
Parabéns e que dure moito a vida do Club de lectura EX LIBRIS do IES de Vilalonga!
Podcast en Historia de 1º de bacharelato
Este é o podcast que fixo Elena Muñíz, alumna de 1º de bacharelato D, como actividade para a materia de Historia do Mundo Contemporáneo que imparte a profesora Patricia Díaz. Pareceunos que merecía ser destacado polo seu bo facer e o seu traballo. O tema: as revolucións industriais.
Tamén moi destacado foi o traballo de Daniel Castro, deixovos aquí o enlace para que o desfrutedes:
Botádelle un ollo.
Árbore de Nadal superorixinal.
Dende
o IES de Vilalonga desexámosvos un nadal fractal (infinita felicidade nun
espazo acotado), á semellanza da árbore de Sierpinski, realizada de xeito
cooperativo por todo o alumnado da ESO mediante a construción, utilizando
técnicas de papiroflexia, de pequenos tetraedros de papel.
Departamento de matemáticas. Gutier Fernández Villar.
Bo Nadal a todas /os.
O equipo da Biblioteca do IES de Vilalonga felicita o Nadal e desexa un próspero e máis tranquilo Ano Novo a toda a Comunidade Escolar.
Ánimo e forza!!!
Obradoiro de animación (21 días de galego)
O xoves 17 de decembro tivemos a oportunidade de gozar coas achegas de Borja Guerrero e Carlos Madureira, da editorial OQO, ao mundo da animación. Foi un obradoiro no que coñecemos a historia desta arte e nos explicaron varios aspectos sobre o incrible mundo das imaxes en movemento, de como funciona o noso cerebro no campo visual, das necesidades técnicas neste traballo, os primeiros obxectos ou "xoguetes" relacionados con el... E logo chegou o mellor: facer as nosas propias animacións en plastilina coa app Stop Motion. Encantounos deixar saír o lado creativo e comprobamos que algúns participantes teñen moito xeito e poden acabar sendo uns artistas de primeira!
Actividades Fp básica- lectura.
A acollida do libro Xenia tes un whatsapp foi excepcional. Este libro de literatura xuvenil enganchou desde a primeira páxina ao alumnado de 1º FPB-Administrativo o que nos fixo reflexionar sobre o bo intre que pasamos grazas a lectura daqueles libros que son do noso interese. De aí xurdiu a idea de elaborar unha serie de carteis publicitarios para promocionar nas súas redes sociais no que motivasen aos seus amigos/ as a ler libros utilizando para iso unha linguaxe coloquial e que conseguise dar no cravo: COMO PODEMOS FACER PARA QUE UNHA MOZA/Ou DA túa IDADE QUEIRA
LER? Aquí o resultado:
Cristina Meis
Manuel Fernández
Noelia del Valle Alex Chan |
Saida Martínez |
| Aleksander Méndez |
Un ilustrador no IES de Vilalonga
O profesor de plástica Eduardo Pérez Baamonde fixo esta
fermosa e interesante acuarela. Titúlase Enredante (en-red-ado), nela un
mozo aparece facendo un selfie diante dun panel cunha paisaxe caribeña. Ten os
pés afundidos en lastres de cemento con iconas das redes sociais. No chan
espallados hai: unha botella, unha caixa de pizza, cabichas, un cinceiro... Non
sabemos se está dentro ou fóra pero a parede está esconchada.
Sen
dúbida quere transmitir varias mensaxes:
-
Queremos aparentar o que non somos.
-
Sublimamos modelos ou estilos de vida inalcanzables e enganosos.
-
O consumismo a ultranza fainos máis pobres e sectarios.
-
Non importa o que se é, senón a imaxe que os demais teñan de ti.
Parémonos a reflexionar, vivimos nunha cultura que se esconcha, que todo o quere rápido e pasaxeiro; o ser humano precisa tempo para formarse, para pensar. Non fagamos caso de todo aquilo que quere atraernos e confundirnos con cantos de serea. Non nos deixemos levar por unha subcultura superficial, enganosa e consumista.
O outono a concurso!
RETO: PALABRAS, DITOS E FEITOS DO
MES DE SANTOS
-Novembro de estío, a
porta do frío.
-Polo novembro as noites van crecendo.
-A
cada porco chégalle o seu San Martiño.
- O día de San Martiño, proba o teu viño.
-Ata
san Martiño, pan e viño. De san Martiño adiante, fame e frío.
-Sembra
trigo en San Martiño, cada día un pouquiniño.
-Se
novembro comeza ben, confianza has de ter.
-Do 20 de Novembro en diante, o inverno xa
é constante.
-Polo San Simón pon o tapón, polo San
Martiño proba o viño.
-Polo San Andrés, colle o porco polos pés,
a galiña polo rabo e levaos ao mercado.
-Novembro
acabado, inverno empezado.
-Se
novembro empeza ben, nada hai que temer.
-Polo
novembro, as noites van crecendo.
-Entre
santos e natal inverniño caroal.
-No día de defuntos, memoria e frío van xuntos.
-O
veranillo de San Martín, dura tres días e fin.
-O
veranciño de san martiño dura tres días e un pouquiño.
-En
novembro voan casas, vén o vento.
-De
Santos ó Nadal é o inverno natural.
-Polo
mes de Santos, xa baixa a neve ós campos.
-Por tódolos santos, neves nos altos.
-San Xoán garda a chave do pan , San
Martiño a do viño e San Andrés a do porquiño.
-Castañas,
noces e viño fan a ledicia de San Martiño.
-Por
Todos os Santos, frío nos campos.
-Do
San Martiño en adiante, non hai demo que o aguante.
-San
Xoán trae o inferno e San Andrés o inverno.
-Polo San Martiño ,o teu mosto xa é viño.
-Cada cousa no seu tempo e os nabos en
adviento.
-No mes de nadal o carón da lareira vaite
sentar.
-Polo Pilar os nabos a terra e o viño
envasado.
-Despois de San Martiño vén o inverno de camiño.
-Por san Martiño, proba o teu viño.
-Auga
de San Martiño come pan e viño.
-Antes
de san Martiño, pan e viño; despois de san Martiño, fame e frío.
-Chegan
os defuntos e chegan os corvos todos xuntos.
-No
vinte de Novembro en diante, o inverno é constante.
-Horta
de San Martiño, mantén ao seu dono e máis ao veciño.
-Auga
de agosto, nin bo viño nin bo magosto.
- Estamos no outono os paxaros marchan xa, o
día é mais curto e o frío vai chegar.
Estamos no outono as follas van ao chan temos
unha alfombra de cores
para xogar e pisar.
Alumnado de 4º ESO
Día Internacional Contra o Maltrato
O 25 de novembro é o Día Internacional Contra a Violencia de Xénero, a biblioteca e o EDLG xunto con toda a comunidade educativa do IES de Vilalonga quixemos visibilizar esta data e manifestar a nosa repulsa contra os feitos deste tipo. Fixemos distintas actividades:
a) Puxemos na entrada unha pancarta:
b) A profesora Ana Belén Vázquez Pardal do Departamento de Lingua Galega e coordinadora do EDLG fixo un audiolibro co seu alumnado, na parte técnica axudoulle a profesora de Lingua Castelá Fátima Barreiro. Preme nesta ligazón para escoitalo:
Con el esperamos animar a coñecer, ler e escoitar unha historia na que moitas rapazas e mulleres se poden ver identificadas, das que todas as persoas podemos aprender algo, facernos máis conscientes dunha realidade que nos rodea e contra a que temos que reaccionar.
Participaron na elaboración deste audiolibro do relato de María Reimóndez: A esencia da cidade, os seguintes membros da comunidade escolar do IES de Vilalonga.
Alexia González Simes1º BACH C
Ana B. Vázquez Pardal Lingua galega e literatura
Andrea Dovalo Méndez 3º B
Arturo Juíz Río Matemáticas
Daniela NoresLópez 3º A
Iago Alonso Barriga 1º BACH C
Jennifer Lamelas Barreiro3º A
Laura González Castro 3º B
Lidia Fernández Lingua galega e literatura
Marcos Chaves Montenegro Xeografía e historia
Mario SantisoFerreirós 1º BACH C
Martín Agraso Otero 3º A
Martín Ameneiro Cacabelos 3º A
Martina Afonso Torres ESA
Miguel Anxo Rodríguez Pena Lingua galega e literatura
Nicolás Fontán Piñeiro 3º B
Nicolás Soutullo Vidal 3º A
Patricia Díaz González Xeografía e historia
Sara Piñeiro Vizoso 3º B
Vicki Villar Mosquera Lingua galega e literatura
c) Participamos no concurso da Secretaría Xeral de Igualdade e Secretaría Xeral de Educación da Xunta de Galicia "Lemas contra a violencia de xénero". Participou o alumnado de 2º de bacharelato e 4º da ESO. Os gañadores foron:
3º.- Andrea Ara Solla.
Fixemos carteis con eles, plastificámolos e colgámolos nos tres edificios.
d) Os últimos 15 minutos da cuarta hora da mañá, ás doce menos cinco en todas as aulas os profesores falaron sobre a violencia de xénero e lemos poemas de temas relacionados coa mesma.
e) A biblioteca preparou unha exposición de libros relacionados coa loita pola Igualdade e o recoñecemento do traballo e o valor das mulleres. Hai dous cursos que inauguramos a nova sección de Feminismo e Igualdade, alí colocamos os materiais relativos a estas temáticas. Aproveitamos para mostralos e incentivar o seu uso.
f) Exhibimos na biblioteca, orgullosos, os nosos premios dos concursos de Igualdade destes cursos pasados. A profesora de Xeografía e Historia Patricia Díaz impartiu os últimos cursos a materia de Igualdade e participaba con frecuencia, co seu alumnado, en diferentes concursos, cun notable éxito.
g) O martes 24 de novembro, ás 10:00h, a profesora Patricia Díaz, con dous representantes do alumnado premiado pola Secretaría Xeral de Igualdade en edicións anteriores no certame do 25N, na modalidade de vídeos, Lorena Míguez (4ºESO) e Héctor M. Vidal (3º ESO), van participar nunha xuntanza virtual con outros centros premiados en cursos anteriores, evento ao que foron convidados pola Secretaría Xeral de Igualdade como recoñecemento polo seu traballo nos cursos anteriores.
h) Proxectamos na pantalla da entrada do Intituto o vídeo que fixemos con motivo do Día da Muller, como mostra do traballo feminino que sempre estivo e segue estando.
Este curso non puidemos concentrarnos, como en cursos anteriores, para manifestar a nosa repulsa por feitos tan inxustos e inhumanos, porén non pasou desapercibida esta data, para o próximo curso volveremos a xuntarnos.
Día das librarías
O 13 de novembro celebrouse o Día das Librarías, eses pequenos comercios cercanos que atesouran miles de mundos por descubrir. Queremos agradecerlle desde aquí o seu esforzo por asesorarnos e axudarnos a diario.
Todos tus Libros.com é a plataforma da pequena e mediana librería que acaba de incorporar o comercio online ás súas prestacións de consulta, difusión cultural e interacción co usuario. Un proxecto estratéxico, de carácter colectivo e asociativo, cunha filosofía participativa, co que queremos achegarnos ao consumidor dixital pero sen renunciar aos principios que nos caracterizan: a diversidade libreira, a atención personalizada, a bibliodiversidad e o noso papel cultural.
Nun momento social, sanitario e económico tan complicado, coa celebración do Día das Librerías queremos destacar o noso esforzo por manternos vivas e activas, dinamizando as nosas contornas, xerando cultura e comunidade a través dos libros e as lecturas, ademais de darvos as grazas por elixirnos e por defender o voso espazo e tempo individual de lectura.
CEGAL: Confederación Española de Gremios e Asociacións de Librarías.
PALABRAS, DITOS E FEITOS DO MES DE SANTOS
Xa estamos en novembro, un mes no que se celebran os magostos, se fan as matanzas do porco e outras festas e feiras tradicionais moi arraigadas en todo o territorio galego.
O día 1, día de Tódolos Santos, tamén serve para darlle nome: Santos ou mes de Santos.
Moi común é a de San Martiño (ou mes de San Martiño), festividade que cae o día 11 e que está asociada a un pequeno “verán”, o de san Martiño, que “pode ser grande ou pequeniño”, como di o refrán.
Por celebrarse neste mes o día de defuntos (2 de novembro), recibe os nomes de mes dos mortos ou, simplemente, mes morto; tamén mes das ánimas.
E, por caer neste mes o día de Santo André (o 30), tamén recibe o nome de mes de San Andrés ou, simplemente, San Andrés.
Son moitos os ditos e refráns que recollen elementos propios deste mes: o porco, o viño, o frío, as festas…
Serías capaz de achegar unha palabra asociada a este mes, un refrán ou dito, unha tradición... e poñela no noso blog http://abeiradaspalabras.blogspot.com/ou no Facebook https://es-es.facebook.com/iesvilalonga/ a través dun comentario a esta entrada?
A ver cantas xuntamos neste mes de San Martiño!!
(EDLG e Biblioteca do IES de Vilalonga)
Facilitar a aprendizaxe de Lingua Castelá
A biblioteca ten os seus libros, acércate a velos:
Subscribirse a:
Publicacións (Atom)