Exposición do Centro de Tulizeni

No taboleiro do edificio de Bacharelatos e Ciclos podemos ver novas fotografías de Antonio Pampliega que complementan as expostas no taboleiro da Biblioteca do edificio principal co gallo da celebración do Día da Biblioteca.

Son  imaxes de mulleres adolescentes, nais, repudiadas, vulnerables polos estragos da guerra, vítimas de violencia sexual, abandonadas, rexeitadas pola sociedade e imaxes de menores abandonados, nacidos de violacións, vítimas de violacións reiteradas, non acompañados agrupadas en dúas series: As mulleres do Centro Tulizeni  e  Os menores do Centro Tulizeni.

Esta exposición procede do IES Castro Alobre de Vilagarcía de Arosa.

Día da Biblioteca.

 O 24 de outubro  celébrase o Día da Biblioteca e con tal motivo a Biblioteca do IES de Vilalonga realizou unha exposición de fotografías de Antonio Pampliega agrupadas baixo o título “O seu futuro depende de nós”.

Son imaxes que reflicten miradas que  transmiten dor, pero tamén ilusión e desexos de seguir loitando por unha vida mellor ou simplemente sobrevivir.

No Congo, en Siria, en Somalia, no Kurdistán a cámara captou cidades convertidas nun campo de cascallos, nenos que foron secuestrados para seren convertidos en soldados, mulleres vítimas de violacións que despois foron repudiadas polos seus homes ou cando menos obrigadas a abandonar os seus fillos, corpos con membros amputados pola guerra...

Noutros casos a imaxe é a de seres que arriscan a súa vida partindo desde países como Libia na procura dun mundo mellor cruzando o Mediterráneo ou a de rapaces que aínda son quen de atopar momentos para o xogo e a ilusión na realidade adversa  que os rodea. Prestounos esta exposición o IES Castro Alobre de Vilagarcía de Arousa.

Antonio Pampliega (Madrid, 1982) é un periodista  cuxas reportaxes en numerosas zonas de conflito (Afganistán, Iraq, Líbano, Paquistán,  Siria...) foron difundidas en canles de televisión como a CNN, a BBC ou  xornais como The Times, El País ou El Mundo.

En 2015 permaneceu secuestrado en Siria polo grupo terrorista Al Qaeda durante 299 días, experiencia extrema que recolle no libro En la oscuridad (2017).

Coltán, matrimonios amañados de nenas afganas, secuestros en Venezuela,  Ku Klux Klan, cazadores furtivos,  prostitución infantil...  son temas  captados pola súa cámara para achegarnos unha realidade que non  debería deixar impasible a ninguén.

 

 Eduardo Pérez Baamonde, membro do equipo da biblioteca e profesor de plástica,

fixo este bonito cartel para celebrar o 24 de outubro. A biblioteca ten un papel fundamental no Centro, 

pois garda cantidade de materiais útiles para a aprendizaxe, a información, o lecer, etc. Serve como lazo de unión entre todos os membros da comunidade escolar e presta o seu espazo para xuntanzas, obradoiros, visitas de escritores, exposicións, etc.

Recollida de alimentos

 Co lema: "para que non haxa ningún prato baleiro"  ao longo do mes de decembro recollemos alimentos e produtos de primeira necesidade do fogar no IES de Vilalonga. Organizouno o Departamento de Relixión en colaboración con Cáritas de Sanxenxo. A profesora Ana González, xuntos con algúns dos seus alumnos/as,  colocou os carteis e anuncios da campaña. Os obxectivos eran fomentar a solidariedade social do alumnado e facer visibles problemas cotiáns que a miúdo pasan desapercibidos.

  

 

     Bo Nadal!!!!!

Rede solidaria da mocidade

O IES de Vilalonga está integrado na ONG Entreculturas,desde o curso pasado e  dende o 20 de outubro de 2018 temos unha exposición da mesma no Centro. Esta organización quere mobilizar aos xóvenes para levar a cabo: entontros na rede, obradoiros de sensibilización e xogos. Cada ano máis de 2000 mozos /as e máis de 200 profesores participan na rede solidaria. Persiguen múltiples obxectivos como son: Campaña mundial pola educación, menores soldado, igualdade ou pobreza cero.

Entreculturas é unha fundación para a educación e o desemvolvemento dos pobos: Moita xente pequena en lugares paquenos facendo cousas pequenos pode cambiar a faciana da Terra.

 

  VÉN A VELA!!

 

Entre-culturas: Campaña mundial pola educación.

O pasado xoves, 3 de maio DO 2018, 42 alumnos e tres profesoras do IES de Vilalonga fomos a Santiago a participar no acto central da SAME(Semana de Acción Mundial pola Educación),xunto con outros colexios e institutos de Galicia.

Primeiro, nun auditorio, expuxemos, cada centro, as nosas conclusións do traballado e aprendido acerca do dereito á educación e de como hai lugares do mundo e situacións que dificultan que miles de rapazas e rapaces accedan a ese dereito: pobreza, guerra, inxustiza, catástrofes naturais... Fixémolo con vídeos, pequenas representación teatrais,música, xogos... Logo fomos todos xuntos en marcha cara á Praza da Quintana, coreando lemas como "A educación é o camiño para a paz" " A educación é a solución" e " Deixa a túa pegada pola Educación". 

Nestas fotos e vídeos podedes vernos coa pancarta e as pegadas que levamos desde o instituto. Na Quintana esperáronnos os políticos que nos representan en cuestión de educación e cooperación, aos cales

expuxemos preguntas e peticións para unha contribución verdadeira a

que a educación chegue a todos, para que os países se desenvolvan e o fagan en paz.

Podedes ver uns vídeos da mesma nestes enlaces:
https://youtu.be/OOj_CjqroiA

https://youtu.be/LQTWPini0vM

UN MUNDO DE ENCONTROS PARA CAMBIAR O MUNDO

O martes 10 de abril, Abel, monitor representante da fundación Entreculturas, veu ao IES Vilalonga a dar un obradoiro chamado: "Un mundo de encontros para cambiar o mundo". Antes de empezar, comemos todos xuntos. Nese obradoiro participaron os nove alumnos e alumnas do grupo solidario máis outros catorce alumnos/as que se quixeron sumar, de 1º, 2º e 3º da ESO, e 1º e 2º de Bacharelato. Durante unha hora e media Abel fíxonos pensar na importancia da educación para que o mundo funcione mellor e non haxa desigualdades. Partindo dunha reflexión sobre as fortalezas de cada persoa, de onde veñen e a onde nos poden levar, representadas nunha árbore, fomos animados a implicarnos na transformación social. Algúns nos demos conta de que nos empezamos a concienciar para a solidariedade.

8 de marzo Día da Muller

Recordamos o Día Internacional da Muller, 8 de marzo, con distintas actividades. Os días anteriores a Biblioteca preparou unha exposición sobre mulleres importantes na historia  en diferentes campos : matemáticas, astronomía, física, filosofía, etc. empregamos para a mesma unha serie de carteis enviados pola Xunta de Galicia.

Un grupo de alumn@s de 2º de bachiller e profesoras fixeron pancartas con lemas relacionados con este evento e lazos morados para a comunidade escolar:

Na pantalla da entrada do Edificio 1 proxectamos vídeos sobre igualdade, enviados pola Xunta de Galicia e outras institucións: Ministerio de Educación, Centros escolares, etc.

O día 8 de marzo fixemos unha concentración na entrada do IES a favor da igualdade de xénero, durante a mesma lemos un manifesto sobre as peticións dos diferentes colectivos neste día (sindicatos, partidos políticos, asociacións feministas, etc.)

RECOLLIDA SOLIDARIA DE NADAL

O grupo de rede solidaria da mocidade vinculado á ONG Entreculturas, formado recentemente no instituto e promovido polo Departamento de Relixión, organizou nuha recollida de alimentos e outros artigos de primeira necesidade para donar a Cáritas de Portonovo, dentro da súa campaña de Nadal. Esta actividade tivo lugar entre os días 30 de novembro e 5 de decembro pasados. O grupo encargouse de difundir a súa proposta, colocando carteis, expoñendo a actividade polas aulas e mantendo un contacto constante coas representantes da delegación de Portonovo. O martes 5 de decembro, pola tarde, dúas representantes de Cáritas Portonovo, achegáronde a recoller a donación e explicaron ao alumnado de 2º de bacharelato e 1º,2º e 3º da ESO, cal é a súa función, que necesidades atenden e cal é o destino dos produtos recollidos. A biblioteca colaborou con esta iniciativa publicándoa no seu blog "A beira das palabras".

CAMPAÑA SOLIDARIA DE NADAL

O Departamento de relixión, en coordinación coa Biblioteca, e  a clase de 2º B de bacharelato organizaron unha recollida de alimentos de cara ao Nadal. Contactouse con Cáritas local para a recollida dos mesmos. Os días previstos para a mesma son do 29 de novembro ao 5 decembro.

O obxectivo é traballar en valores, en especial, a solidariedade.

COLABORADE!!!!!

PANCARTA CONTRA A VIOLENCIA DE XÉNERO

O alumnado de 1º de FP básica da rama de administrativo fixeron co profesor da materia de Comunicación e Sociedade, Manuel Radío, un mural con imaxes, listas de vítimas e estatísticas sobre a lacra da violencia de xénero na nosa sociedade. O obxectivo principal era educar en valores, como a iguladade e a solidariedade, así como concienciar da importancia e a inxustiza deste problema.

TRABALLEMOS PARA QUE ESTE PROBLEMA DESAPAREZA. QUE AS XERACIÓNS FUTURAS NON TEÑAN QUE SUFRILO. PARA QUE DEIXEMOS DE AVERGOÑARNOS!!!!                                                                              

Recollida solidaria de tapóns para Nahir

Solidarizándonos con Nahir (unha nena de 5 anos con parálise cerebral infantil con tetraparesia discinética) e a súa familia imos participar na recollida de tapóns de plástico para axudar a esta nena a acceder a un tratamento que melloraría a súa calidade de vida. 

O contedor  está no vestíbulo do instituto ao lado de conserxería e se vos interesa podedes saber algo máis acerca do seu problema pinchando neste enlace .

BIBLIOTECA SOLIDARIA

                                                   

Dentro do ciclo de conferencias, iniciado no curso 2015/16, no marco do Proxecto Biblioteca Solidaria 

do IES de Vilalonga, presentamos este venres día 11 de novembro de 2016 ao xornalista exipcio Ahmed Ali Abdelhamid, en colaboración con

 Amnistía Internacional.

Este foto reporteiro, exiliado do seu país, falaranos da situación actual en Exipto e as vulneracións dos dereitos humanos neste país.

Promete ser moi interesante  e permitiranos coñecer a situación que se está a vivir noutros lugares non tan lonxanos.

O  coñecemento leva ao entendemento e a solidariedade.